english deutsch italiano español slovenščina furlan

Cjamin tape daûr tape

Home Percors Troi Furlan Tapis in detai

Preambul


This section is available only in Italian language.

Dut il materiâl proponût
in cheste sezion al è disponibil intun unic file comprès clamât Percors detaiât complet di cjartinis li de pagjine Par durmî e file utii.


L’ "Iter Aquileiense", o "Troi di Aquilee" al è un itinerari nassût par iniziative di un grup di personis di diviersis associazions; personis che a vegnin di ambits ancje une vore diviers tra di lôr, che tantis di chês no si cognossevin, ma unidis dal jessi pelegrins, feminis e oms che si metin in cjamin par rivâ a une mete spirituâl. Tancj di nô a àn vivût la esperience dal Pelegrinaç a Sant Jacum di Galizie.

O sin talians, slovens e furlans, e o sperìn che in curt si unissin a nô ancje personis de Carinzie. O amìn cheste nestre tiere e o volìn che cheste e sedi lûc di pâs, fraternitât e convivence amichevule fra i popui e lis culturis. Par chest o vin pensât a un percors internazionâl che al puedi fâ converzi pelegrins des diviersis nazions intun lûc tant particolâr: il santuari de Mont Sante dal Lussari, dulà che la imagjin de Mari Marie e je venerade di secui di dutis lis nestris ints, che chi a rivavin fasint trois che in part o sin rivâts a riscuvierzi in gracie dai segns ancjemò visibii de lôr fede e de lôr creativitât.

L'Iter Aquileiense, che o vin screât intal Istât dal 2006 cu la benedizion dai nestris vescui, al è componût di trê percors che a àn origjin in trê localitâts tant significativis pe storie e la tradizion di fede des nestris tieris, une in Friûl (Aquilee, dulà che pe prime volte al è stât anunziât il Vanzeli e di dulà che i missionaris a àn puartât l'anunzi cristian intal cûr de Europe), une in Slovenie (Brezje, li di Kranj, il lûc plui impuartant di invocazion de Mari di Diu in Slovenie) e une in Austrie (Marie Saal, parsore Clanfurt, glesie splendide cun origjins tor dal VIII sec., centri di grande impuartance pe storie de Carinzie e pe identitât culturâl e religjose de cussì clamade Mitteleurope); trê percors che a puartin i pelegrins, a pît, des localitâts di divignince fin a unîsi a Cjamparòs, par dopo lâ sù insiemi ai passe 1760 metris de Mont Sante dal Lussari.

Il percors furlan, di Aquilee, si fâs passant Cormons, Madone di Mont, Cividât, il Grant Mont e lis vals di Resie e di Dogne; chel sloven, di Brezje traviers Jesenice, Kranjska Gora, Ratisče, Fusinis e Tarvis; il tierç, chel austriac, di Marie Saal, passant Clanfurt, Marie Worth, (in curt) Marie Gail, Arnoldstein, Cocau e Tarvis.

Dai 7 ai 15 di Avost chest pelegrinaç al è stât fat pe prime volte di nô e dai amîs che a àn volût e podût judânus in chest "batisim". Fuarts di cheste esperience, o sin daûr a continuâ a lavorâ par miorâ cierts aspiets e detais. Di Jugn dal 2007 il troi al è stât in idealmentri "consegnât" a ducj chei che a volaran fâlu. Ogni pelegrin al podarà partî cuant che al volarà, costruint il so troi daûr des propriis esigjencis, sielzint tra lis variis pussibilitâts che l'itinerari al ufrìs.

Cumò chest itinerari al sta ben planc evolvintsi intune dimension plui largje, une dimension che nô ducj si augurìn, che e je chê di jessi no tant un percors locâl, ma une part di alc di plui grant, part di une grande rêt di viis di pelegrinaç. Di fat il compit che si sin cjapâts, e jo in particolâr, tant che chel che al segne il percors, al è, di là de valorizazion tant impuartante dai lûcs e dai aspiets plui significatîfs che si puedin cjatâ, chel di dâ ai pelegrins che a passin pes nestris tieris un percors sigûr e adeguât al cjamin che a àn tacât.

Al è disponibil cumò une vere e proprie vuide dal Troi di Aquilee, cul titul "Il Cammino Celeste - A piedi da Aquileia al Monte Lussari" cu la cjase editore "Ediciclo" di Puart; la vuide e je componude di 178 pagjinis, 120 imagjins a colôrs, 25 cjartinis Tabacco in scjale 1:25.000 cul percors detaiât e tancj tescj descritîfs. E pues jessi ordenade inte proprie librarie di fiducie che e proviodarà, intal zîr di 2-3 dîs a recuperâle; o li dal sît dal editôr: "Il Cammino Celeste" - Ediciclo Editore.

In avignî o contìn di ufrî cheste propueste in diviersis lenghis, cussì di dâ ai pelegrins di ducj i Paîs un percors di spiritualitât apassionante, di fâ a pît, par cressi inte fede, inte sperance e inte caritât.

O vuei fâ presint che chel che o feveli NOL È (e nol vûl jessi) un viaç organizât: no je nissune iscrizion, no je nissune struture organizative, nissun (se no lu fasarês voaltris) al visarà i ponts di acet pussibii che o sês daûr a rivâ. Al è dome un segn viert par un itinerari che par nô al è di fede (e percors di fede al restarà par storie e significât), ma che ognidun in se stes al podarà vivi in mût dal dut personâl, pûr mantignint il “spirt dai pelegrins”. In chest sît al ven descrit il percors furlan (di Aquilee ae Mont Sante dal Lussari) e austriac (di Marie Saal ae Mont Sante dal Lussari), intant che chel sloven al è in fase di realizazion.

In riferiment al prin, la propueste e je articolade in dîs tapis (intal event di scree a jerin stadis nûf), cuantitât che la esperience e à mostrât jessi chê plui juste. Tant che in ogni pelegrinaç, però, ogni pelegrin al podarà costruî il so daûr des propriis esigjencis e intindiments. Za cumò, di fat, al è pussibil diversificâ l'itinerari, sedi passant la gnot in lûcs diviers di chei “principâi” sedi aprofitant di cualchi variante significative, tant che chê de Abazie di Rosacis.

Aprofitant dal fat che al è stât viert il confin tra Italie e Slovenie, e je in preparazion ancje une variante che, a cjaval dal confin, e tocje une schirie di localitâts significativis, e che i è stât dât il non di "Variant des Monts sacris". Chest non al è stât mutuât di un itinerari plui piçul, che al ven doprât il so percors. Cheste variante e partìs di Aquilee, e dopo jessi passade par Sant Canzian, a Segrât e va sù sul Cjars, jentrant duncje in Slovenie, dulà che e passe par Mirenski Grad, Castagnavize, Mont Sante e Marijino Celje, par riunîsi cul Troi di Aquilee a Madone di Mont.

Dôs peraulis, infin, sui criteris doprâts par fâ la ricercje dal percors. Nuie di trassendentâl: no son altri che i principis base che ogni pelegrin ben al cognòs:

1) A esistin viis antighis di pelegrinaç, e al è significatîf passâ propit par chês; ma no di râr su chestis viis a àn dopo cjatât puest lis statâls.
2) Lis stradis principâls a son pericolosis par cui che al viaze a pît, e cul pês di un russac; cun di plui al è l'intosseament.
3) Lis stradis principâls, dopo, a son rumorosis, e chest nol jude dal sigûr cui che al cîr il cidin, ancje dome interiôr.
4) Par cuintri, cui che al va a pît nol à sigûr voie di slungjâ i percors, ma al ame cjatâ il percors plui diret.
5) Par cjaminâ, la tiere e je tant plui fofe, e i pîts a son une part impuartante dal pelegrin.
6) Se il percors al è plasevul, al è miôr.
7) La presince di centris abitâts sul percors al e je impuartante par dut ce che a puedin ufrî al pelegrin e, soredut, pes fermadis noturnis.

Par concludi, il gno – il nestri auguri al è che ducj chei che si inviin su cheste vie, par cualsisedi motîf lu fasedin, a vedin il cûr plen di umiltât e di spazi par acetâ ce che cheste esperience e volarà donâur.

E cualsisedi sedi chê che si stais inviant, no pues ce dîus: "Bon Cjamin".


vai all'inizio




Piçulis notis tecnichis


Il Percors

L'Iter Aquileiense o Cammino Celeste o Troi di Aquilee al è un itinerari zovin, e par chest al è in evoluzion. Chest fatôr al influìs su tancj aspiets.

Il percors al è costituît di dute la sielte pussibile di viis, e al è stât costruît doprant chês esistentis. Si che duncje, ancje dulà che a son bariglariis e trois, al varès di jessi simpri praticabil (fale che cu la nêf). In ogni câs, cence jessi stradis dedicadis o in dut câs garantidis in funzion dal Troi, cualchi sorprese e podarès capitâ. Ancje in planure, cemût che al è sucedût di resint par vie di cantîrs o di modificazions de viabilitât. Naturalmentri no je la pussibilitât di controlâ cun assiduitât lis lôr cundizions; eventuâi problemis a podaran jessi segnalâts scrivintnus ae direzion di pueste eletroniche: camminoceleste@libero.it.

Il Troi di Aquilee si pues fâ par intîr dal mês di Jugn al mês di Setembar; in Invier invezit, par vie de nêf che in cierts agns e pues rivâ a cuvierzi luncs tocs su passe metât dal percors, si puedin praticâ dome lis primis tapis.

Cui che al à fat il Troi di Sant Jacum di Galizie al sa che la conformazion dal teritori spagnûl e je tâl di consintî la costruzion di stradis cuasi dapardut, e ancje dulà che si cjamine su troi si lu pues fâ in cundizions di trancuilitât assolude.

Il teritori dal Friûl, invezit, al è tant plui ert, e dispès al è stât necessari sielzi tra il percors di mont, la statâl o un zîr larc. Il pelegrin nol cîr la fadie, ma nancje che le evite a priori, cuant che la alternative e je piês. Cussì dal pont di viste altimetric il Troi di Aquilee al è risultât un percors impegnatîf. Cui che al à iniment tant che paragon il Camino de Santiago de Compostela (o Sant Jacum di Galizie) che al torni a valutâ lis propriis considerazions. In chei plui o mancul 200 km de sô lungjece bisugne fâ plui di 6.700 metris di rive sù e cuasi 5.000 di rive jù. Duncje o vês di jessi pronts a une buine dose di fadie.

Altri aspiet. Si sa che la mont e je mont, e in cheste no si pues pretindi dome viâi e clevis dolcis. Cussì, pûr lavorant par cjatâ percors trancuîi e sigûrs, no sin rivâts a evitâ nissun pont dulà che, pal gjenar di passaç, pes dimensions dal troi, pe sô pendence o par chê dal flanc de mont, o par cualchi altre dificoltât, il viandant al à di stâ plui atent. La atenzion normâl, invezit, chê che e fâs procedi cence cirî situazions di pericul, si le calcole aplicade naturalmentri. In nissun câs a son stâts metûts tocs cun dificoltâts tecnichis.

Inte vuide a son stâts evidenziâts i pôcs passaçs delicâts, intant che a son stâts calcolâts facii ducj chei dulà che la atenzion normâl e je plui che suficiente. Naturalmentri, par chei che a vessin di vê problemis particolârs (par esempli inzirlis) e je la pussibilitât di passâ stradis alternativis, ma in gjenar chestis a son lis stradis asfaltadis di fonts de val, e cuasi simpri a compuartin un slungjament, ancje considerevul, dal percors.

Lis considerazions parsore espostis si slargjin in automatic ancje a un altri aspiet. Ven a stâi se pe part di planure un pâr di sandui di trekking al va benon e pes parts su strade forestâl lis scarputis a puedin bastâ, su ciertis parts di troi si puedin conseâ i scarponcins, o almancul scarpis altis, massime dulà che la marcje e domande pas sigûrs. Al va sotlineât ancje il fat che il Friûl orientâl al è une des zonis plui ploiosis di Italie.

Intes descrizions, i riferiments di fin e principi tape a son cualchi volte par fuarce gjenerics, o smirâts su glesiis, placis ecc., stant che no si pues previodi dulà che il pelegrin al cjatarà puest par durmî e/o mangjâ. In riferiment ai nons des localitâts plui piçulis, lôr a son segnâts par precision, ma no simpri si cjatarà un cartel che lis identifichi, massime se si ven di stradarolis di campagne. Intal test, in dut câs a son stadis metudis secuencis di numars, lis stessis segnadis su lis cjartinis, che a daran al pelegrin la posizion a ogni crosere o cuasi.

Il percors, infin, al sarà marcjât cun segns di colôr celest, che a judaran i pelegrins a orientâsi intai ponts là che al è pussibil falâ strade.

Problemis, in realtât, no varessin di jessi, parcè che ducj i passaçs ancje pôc impuartants a son stâts descrits; stant che però no si pues contâ ogni metri, e che chel che pal autôr al jere insignificant al pues creâ dubis a altris, tignît simpri presint il principi gjenerâl secont che:

A) Se une laterâl no ven descrite al è parcè che no interesse.
B) Se par une crosere no vegnin dadis indicazions, restait su la vie miôr, o, in câs di tu paris grât, tirait drets.



Ospitalitât

Pe Ospitalitât al esist un file a pueste PDF clamât "Lûcs par mangjâ e par durmî" disponibil li de pagjine web: Notiziis utilis.



Credenziâl

Tant che sul Troi di Sant Jacum di Galizie, e je stade preparade une credenziâl che e identificarà il viandant tant che pelegrin e no tant che turist o escursionist. E in maniere simile a chei altris pelegrinaçs, l'ûs di cualchidune des struturis di ospitalitât e podarès no jessi consintût a chei che a son cence chest document.

La credenziâl e je di podê scjariâ dal nestri sît web li de pagjine Notiziis utilis li de vôs "Credenziâl dal Pelegrin"; e pues jessi ritirade a Aquilee, li de buteghe di souvenir:

"Souvenir Aquileia" di GHIRETTI Andrea
via Patriarca Popone 2 - Aquileia
tel. 0431.919045
e-mail: souvenir.aquileia@libero.it


"Libreria Souvenir alla Basilica"
piazza del Capitolo 4 - Aquileia
tel. 0431.917698


o a Dael cun riferiment Peloi Claudio 328.0028816 (e/o Aurelio Pantanali 348.2517303 intal mês di Avost). Infin e pues jessi domandade ai incuintris de associazion Iter Aquileiense (descrits ae pagjine web: Events), dopo vê visât prime il referent pe consegne de credenziâls:


Marco Bregant
cell. 347.0356623
e-mail: marco.bregant@gmail.com




Cualchi piçul sugjeriment

Cualchi piçul sugjeriment al pues jessi bon, massime a cui nol è pratic di chest gjenar di esperience. A chest fin lait a viodi il file a pueste PDF "Conseis par fâ il Troi di Aquilee" li de pagjine web notiziis utilis.



vai all'inizio




Dut il materiâl proponût in cheste sezion al è disponibil intun unic file comprès clamât Percors detaiât complet di cjartinis li de pagjine Par durmî e file utii.